九巴炒葉蔚琳今次做得好　　抵你發！

九巴於數小前，正式向發動工業行動的葉蔚琳、其丈夫與另一名車長發出終止僱用通知書，明日起生效。即時有一些香港人在新聞下面，按一下嬲嬲，又話要罷搭。其實，九巴今次做得相當出色，實在抵讚。

先從今次新聞去看，葉蔚琳等人發出工業行動時，已有不少香港人停留「今天我」思維，稱「你發起工業行動你的事，總之唔好影響到我就得」。要抗爭、罷駛、反抗有效，或多或少一定會影響到別人。史上有幾多次成功的行動，是和平理性完全影響唔到其他人？香港打工仔都唔支持香港打工仔，若果我是九巴，當然唔會怕你。

有人大叫罷搭就更加弱智，香港的公共交通九巴壟斷不少路線，很多小巴都無法與其對抗，很多人根本無得揀。九巴當然也深知自己「賺硬」，無競爭、明知你班香港人一定要搭，又駛乜驚你大叫「罷搭」？況且，香港人每次所謂的抗爭行動，都係廢up的多。結果是，就算明明可以揀坐地鐵或小巴，到最後大家發覺九巴仍然逼爆。況且，地鐵壞車加價，有香港人又叫「罷搭」，你今天去坐地鐵時，人有少到嗎？

最後要一提的是，香港人所謂表達意見方式，就是在網上留個言，放個「嬲嬲」就算。最可笑的是，這班香港人還會説「總好過唔俾嬲嬲囉，我叫做表達咗我不滿嫁啦」。若果叫這班網民出來，就算不是九巴員工也好，一起和葉蔚琳抗爭的話，他們會做嗎？他們99%都會説「不了，要返工」。