阿鬼
（編按：本文並非政府贊助，純粹小編得知身邊有朋友主動去接種，希望由他第一身去分享自己與朋友的相關經驗。留意接種中心場內嚴禁攝影，除非獲政府新聞處預先安排，故此本文僅能以文字方式分享。此外，若你決定接種，建議事先考慮清楚相關風險，如有需要請在接種前向專業人士如家庭醫生查詢。）
各位winandmac讀者好，我是站長的朋友，早前站長知道我會打BioNTech復必泰疫苗，想我分享一下有關打疫苗的經過，點解會打疫苗、打完有乜感覺、會唔會好大的不適反應之類，接下來會簡單講講我同其他幾個差唔多時間打針的朋友的經歷。
首先，我最初並不打算打疫苗，主要的原因是由細到大睇科普節目都講醫藥、疫苗的研發往往要上十年時間，但今次呢個肺炎疫苗由研發到推出都係年零時間，會唔會存在一些潛在風險？另一方面，也有受到「末日博士」羅家聰博士的講法，即「而家的疫苗有效率，最高都係95－97％，香港而家中肺炎的人數都無香港人口的3％，即使打左疫苗都未必好有幫助」所影響。
隨著不同的報導和睇過一些資料，了解到mRNA技術其實存在了幾十年，只是應用在傳染病的疫苗上是第一次。另一方面是由美國、英國出了疫苗之後，睇住「燒山」每日講疫情數據，打咗mRNA疫苗的地方數據由3月初開始，感染同死亡數字明顯下跌不少。我自己信奉科學數據，所以打疫苗確實係有得諗。除左數據之外，另一個考慮是如果打了疫苗日後其他地方開關，即使唔係移民走，最少可以去其他國家旅行散心，或者預早為移民去不同地方睇睇，做好一定的準備，所以最後都係打針。
到左3月中旬，政府宣布降低接種年齡到30歲起，於是預約接種。網上預約時，最慘是我想約晏晝的時間，但是在住的區就無得約，唯有跨區打。本來是約了3月尾打，偏偏到我預約打第一針之前幾日就爆左樽蓋問題，結果我和一位朋友A就推遲到4月中先打第一針。
4月中臨打之前幾日，我就請教另一位做食肆的朋友B打疫苗的反應，他在3月尾樽蓋出現問題前，就打曬兩針。他指打第一針後的反應比較大，打針的手臂在接種後第二天痛到舉唔高過頭。至於朋友A比我早幾日打，他的情況也是差不多，打完針過幾個小時都有點攰的感覺。
到了我打針的當日，我比原本預約的時間遲了5分鐘左右，入場時以為一定要用「安心出行」，幸好當時仍可以手寫資料入場，臨入場前職員會Check SMS，確定無去錯地方。入場之後，對返個人資料，跟著場地職員就比左一個細的文件夾、一份講解BioTech疫苗同副作用的小冊子，打針之前要睇同剔BioNTech的小冊子，職員安排我在等候區坐低睇，等候區分左4個，每個區有15張櫈，每5張一行，每張櫈前後左右都隔開大約1米多少少，坐低望過場地，休息區大約坐左三成人左右，人數唔算多。
等候期間職員會再三確定係咪嚟打BioNTech，等候區坐夠15人就有職員用小型大聲公播放返場地是打BioNTech、打針的安排，問下有無人以往打疫苗有敏感。之後就逐排逐排行去打針。一行到去，職員都會即時指示行去邊個房間打針，避免人群聚集。入到房，護士會對多一次身份資料、檢查有無剔到小冊子，又會同你再三確認打的是BioNTech，另外會問參唔參加醫健通。因為好多年未打過針，原本諗住會痛，不過打針的時間都好快，好似一拮就抽左針咁。打完針護士會有張「針紙」，上面有打針日期、批次、QR code，針紙底就有張好似學校回條咁，可以剪出嚟放銀包，護士話打第二針的時候要帶返，之後寫張紙去休息區坐到幾點走得。
行去休息區就無等候區咁分曬區，但亦有職員帶位同問有無唔舒服，坐夠15分鐘就自己起身拎住「離開時間」的紙比出口職員就走得，仲有包口罩可以拎。雖然交稅唔多，但幾打都拎，唔係個PK政府又拎啲錢同物資周9圍fing。成個過程都幾快，由對資料到打完針休息走，大約用30分鐘，不過我打針個場地電話收的訊號近乎零，其他朋友打針場地就無呢個問題。
打完針，初初幾個鐘都無乜feel，仲以為護士打左生理鹽水比我，跟手去買餸準備晚餐。到左夜晚就開始出現痺痛，但痛的程度唔係好大，都無攰的感覺，不過瞓覺轉身的時候壓到打針舊肉會痛一痛攪到醒左。
打針之後第二日，打針嗰舊肉由痺痛的感覺變成了酸痛，好似做完劇烈運動之後個人散曬咁，不過就無其他兩個朋友咁痛到舉唔過頭，另外打針個位有少少腫起。大約去到第三日，亦即差不多48小時左右，就無再痛。
4月尾，同朋友C傾計，佢係香港出世和長大，但學科發展問題在大陸讀碩士、博士，而家在大陸做大學教書同研究。佢阿爸阿媽好藍、打曬兩針科興，佢父母就同佢講佢地打完就有牙肉腫痛。至於朋友C本人就覺得如果要打就會打國藥或者科興，佢本人就覺得mRNA技術太新無乜信心。
其實預約打針前，我同朋友A吹水講過考慮混針，不過是BioNTech混Johnson & Johnson（註：在本文章發表時，香港並未打算引入科興和復必泰以外的疫苗），就算係無得揀要溝科興，都打左BioNTech 先，當然我本人唔係咩專家，未有科學數據就唔好亂來。諗唔到4月尾就出左單新聞報有人打完BioNTech之後再打科興。
到了打第二針，當日我早了一些到，以為要等夠鐘先可以入場，但都可以照進場打。流程基本上和之前差不多，不過今次等打針時，睇休息區的人數多過上次好多，大約坐了7成人左右，而今次也多了南亞、菲傭來打針。另外，朋友A比我早幾日打第二針，佢打第二針之後的反應強過第一針，有發燒、頭痛和胃口唔好。所以，我就順便問問護士，如果遇到這些症狀，去藥房買藥食有無問題，護士就話無問題。不過補充一樣野，第一針時護士叫我帶的針紙，原來係不用帶，白拎。
打針之後大約4、5個鐘，症狀開始出現，不過我同做食肆的朋友B一樣，只係打針舊肉出現酸痛同腫了少少，無好大的應，比起第一針的酸痛程度少得多。呢呢篇文章的時候，睇fb見到有好幾個朋友打疫苗，有朋友打完第二針之後幾個小時出現頭暈，有人覺得攰，其中一位朋友打完第一針之後，症狀維持了5日，他暫時取消打第二針的預約。至於各位打唔打針就自己決定。
記者：ck
