YouTuber大J稱鍾培生「仆街仔」　　指曾與他拍片是「污點」

被指講過「所有罷工醫護都係雞」的鍾培生，早前正式簽約，與林作會有一場拳賽。原本林作經常搏出位，網民印象認真麻麻，但經過林作與鍾培生的記者會後，大家對鍾培生全面扣分，林作反而大加分。鍾培生近日仍然有不停出片，似乎心情無乜受影響，早前更接受藍絲KOL黑超哥的訪問。網民亦因此認定鍾培生就是超級藍絲。

在拳賽未發生前，曾與鍾培生拍聖誕節影片的YouTuber大J，當時大J片段一推出後，亦有引發不少人反感，甚至有人誇張地稱大J是藍絲。

大J於近日的遊戲直播頻道中也有評論鍾培生近日的表現，直指鍾培生「仆街仔」。大J原本以為他是「貼地啲」的富二代，但最近只是為了引起注意，做出走火入魔的行為。大J續指曾與鍾培生拍片是「污點」，他明白鍾培生可能因為聲稱無政治立場而選擇與黑超哥拍片，但他認為都無理由搵這個「x樣」。大J指鍾培生近來「好核突」，兼「財大氣粗」。有連登網民叫他講嘢小心啲和睇佢面色，不過大J馬上回應稱「Sorry，佢唔係我老細」，亦表明無收錢幫他做什麼事情。