阿鬼
在武漢肺炎未有這麼嚴重時，小編不時都會和其他相識多年的傳媒行家吃飯聊天。而抗爭運動開始後，很多被定為「黃媒」包括我們在內都經常受到藍絲或五毛的留言攻擊。有次與行家吃飯提到，他們直接地問「點解你地個度要ban曬啲藍絲，咁邊個推post」。
小編覺得，不想影響真fans心情，令他們花過多時間去作無謂的爭吵，故此決定見到五毛就封鎖。可是，這位行家提到黃絲抗爭者其實九成都不願意留言或俾反應，更不要講分享，要他們進入網站就更為困難。行家稱「無藍絲再加埋facebook的演算法，根本無辦法推得郁。」講得直接啲，就係與其封鎖五毛，倒不如等他們互相留多一些言，推高觸及率才有用。
講到呢度，相信很多黃絲抗爭者只會識得笑藍絲，話佢地傻仔推post。但其實所謂黃絲同路人，係咪仲係唔明自己問題。口口聲聲話撐，話要REPORT藍絲YouTuber KOL，但卻又不懂得去支持這班黃絲同路人。狂罵多次要訂閱、Like page，留言、分享、俾反應，呢啲同路人永遠都唔肯做。黃絲成日都話要諗清楚，佢地唔似藍絲咁「盲撐」。有人覺得呢件係好事，但唔好意思我地要直接咁講，呢件係壞事，係一件好差好差嘅行為。若果黃絲抗爭者再係咁，係一定會輸。
我地成日都話，而家嘅對手係一班癲嘅人。要打低一個痴線的對手，你會唔會再同佢講道理？點解唔可以學一學藍絲嘅「盲撐」特質，一見到唔淨止我地，所有同路人的新文章、新影片，就立即俾個LIKE、留言、分享，未訂閱嘅快啲訂閱或Like Page。藍絲每一次見到有新片，就一定係短時間做齊上述嘅嘢，YouTube一出片就萬幾views，Facebook一出post都有幾萬個click，社交網絡當然以為係好嘢，自動推介俾更多人去看，觸及人數大為提高。黃絲抗爭者永遠唔做，係咁二睇完就算，咁文宣一定無辦法成功。
可能你地會話：喂，我都要返工嫁。我地淨係想問一句，大家係咪想贏？勇武又唔敢，遊行又唔出，網上文宣又唔落力做，想點？
