阿鬼
深夜係應該寫番文，講番克制警惡行。但所謂同路人唔支持都算，竟然叫我地諗下做唔做落去。我地叫大家留言俾反應推post，與追數字無關，最簡單原因係因為要爭取你地有人㩒番入個網站，否則係度啲facebook video有五百萬view，無人入番個網，都係一蚊都返唔到，都係一蚊收入都無。
TL;DR：簡單黎講我地唔係追數字，係因為若果各位讀者都心領，就咁睇完就算唔俾反應或留言，咁係facebook觸及人數就會低，即係話愈黎愈少人睇到篇文，就算有like page嘅都無用，咁入番去網站嘅機會率就會極低，咁就會等同白做無廣告收入。
我地唔係立場，唔係HKFP，更唔係眾新聞，無問過各位拎一蚊一毫，唔知你地明唔明我地捱得幾辛苦。淨係提醒大家留番多啲言，推番多啲post，入番個網站（你地淨係入一入去，賺幾仙都好過無），原來都係唔啱？都要被人要求執咗佢。
我地明明有三四隻廣告，都因為政見無情情抽起咗。有廣告商直頭打黎明言：「你地係反送中活動中好積極」，講到明尷尬，幾個月人工就咁無曬，要蝕住做，但我地無退縮，更加無叫大家眾籌，因為我地覺得，大家有錢去幫咗真係有需要嘅前線或黃店先。
然後，我地不嫌其煩提番大家，留言和推post，大家都唔鐘意，所謂同路人都要批評。
攰？無人唔攰？咁係咪不停話要休息休息，休息到無得再打先慢慢出番手？淨係要求留個言俾少少返應，阻大家幾分鐘，係咪都唔得？
你地知唔知傳媒被針對得幾緊要？我地今日收工只係行過防暴警前面，又要拉又要鎖，附近又無記者，你知唔知個惶恐幾大？我地淨係提番大家幫手推post，都唔得。
你地返到屋企，話要抖下就可以抖下，話攰就攰唔能理唔睇。我地嘅記者，係晚上零晨都受五毛致電問候，但又唔熄得電話。經常性訓唔到。
我地都仲未計，行出街做休班記者，都要被人跟縱。我地唔係話要咩光環，我地唔可以好似和理非咁，話抖話攰就可以隨時停下。而家淨係叫大家留下言推下post，都唔可以。
有時，出去影大家遊行，鏡頭舉前少少，就要被所謂同路人屌。有時逼不得已要影人裝修（你地知唔知克制警會要求我地一定要做，否則又拉又鎖），都要驚被人私鳥。你有無諗過，做記者其實好多時兩邊都會針對。我地始終都係盡幫，始終強權與弱勢，沒理由企在強權一方。
無錯，做唔做落去係好值得諗，無人想咁煩係咁不停叫大家留言推post。若所謂黃絲可以自動自覺，幫下手，我地一個post都唔駛催大家幫手。就係咁簡單。
