無綫罵部門欠溝通、死撐流浮山生蠔可生食　　食安中心再出post反擊

無綫上次教大家食淡水魚生，嚇到大家都唔知俾咩反應好。真係無諗過只係隔咗兩個月左右，大台又黎料了。今次都算係大灣區嘅，就係中國香港流浮山囉，無綫係東張西望節目入面，話「淨化」的流浮山生蠔可以生食。之後食物安全中心（食安中心）又忍不住出post，但無綫又反擊話有關生蠔的淨化技術由漁農自然護理署（漁護署）提供支援，仲罵兩個部門無溝通咁話。

估你唔到嘅係，食安中心與漁護署其實係有溝通，食安中心出咗個post串番無綫，話「食安中心一直與漁農自然護理署緊密合作及溝通，保障食物安全。 請參考漁護署Facebook post」。漁護署個post就係話一直支持本地漁業發展，係漁業持續發展基金資助下，流浮山都有優質蠔出產。

不過，要提嘅係，漁護署係張相和文字都寫到明，話香港出產嘅蠔只適合熟食，而且資助條款訂明項目生產嘅蠔產品，必須徹底煮熟後先可以食用，產品包裝上都有寫明咁話喎。今次真係唔知大台可以點再駁落去了。