阿鬼
一睇戲名，就知《保鑣救殺手》走喜劇路線，這類歡喜冤家拍住上的戲一早就有，好似《48小時》、《午夜狂奔》都玩得唔錯，今次換轉由Samuel Jackson同Ryan Reynolds做冤家，又有沒有驚喜呢？
《保鑣救殺手》的內容其實不太重要，總之就是Ryan Reynolds飾演的保鑣，於指定時間內把Samuel Jackson飾演的殺手帶到荷蘭海牙國際法庭，頂證東歐獨裁者，由於Samuel Jackson是重要證人，所以沿途有唔少人想阻止佢出庭，而兩人就在打打鬧鬧中向荷蘭進發。
睇得冤家戲，最好就係兩個主角角色夠衝突，從中引發各種笑料及引出之後的惺惺相惜。但可惜保鑣和殺手其實沒有甚麼深仇大恨，後來的情節交待二人有過節其實都有些牽強，所以兩人的角色衝突本身不算多，只能夠講兩個大男人拍檔去達標，當中的笑位全靠Samuel Jackson懂得女人心理，教Ryan Reynolds點去挽救感情而支撐，所以爆笑位是有，但有些在預期之內。
《保鑣救殺手》初段到中段不算緊湊，精彩的打鬧飛車都是進入了阿姆斯特丹才開展，快艇飛車槍戰是最吸引的地方，亦可以盡用當場的場境及特色，尤其是走入當地店舖再打餐飽，充滿地方風情，有如拍緊張版的旅遊特輯，多個精彩場面一氣呵成，絕對是本片的賣點。如果可以增加一些兩個主角的合作抗敵場面，相個會更加精彩及切合戲名主題。
最後要提一提的是女個女配角，分別是Samuel Jackson戲中的妻子Salma Hayek以及Ryan Reynolds的前妻Elodie Yung，兩個角色比較當然是有經驗的Salma Hayek搶戲得多。最後要讚的是畫面及剪接都幾有心思，有些場面其實沒有什麼內容，但因為鏡頭處理得好加上剪接技巧，所以睇得好爽，大家入場時不妨留意。
