係香港食餐飯　　真係無尊嚴過你部手機

係，我明白香港租金昂貴、食材入口唔平、人工又上升，做餐廳唔係真係咁易做。但有啲時候，每日係出面食飯，真係覺得無尊嚴過一部手機。我唔係講緊侍應的服務，因為作為香港人，都知香港工作辛苦，佢地西口西面你都唔怪得佢。今次想講嘅係嚴重搭枱的問題。

你可能會話，人地都寫明，一個卡位係坐四個人，有乜好嘈。我當然明白，但作為一個毒男，去到一間只有卡位的餐廳，坐係一個卡位都好正常，因為無得揀。我亦都明白，若果一個卡位坐咗一個人，另外一邊要搭多一個甚至乎兩個人，都係好正常嘅事。不過，近排去尖沙咀一間餐廳食飯，明明一張枱已經有成三個人坐咗，仲要係我個邊再搭多一個人。
[the_ad id=”41111″]
本來諗住都算，但有啲時候，你對面搭枱搭兩個人其實都算，但你旁邊再搭多一個唔識的人，真係除咗逼，同埋食得好辛苦之外，都唔知點形容。最慘個位係近窗，太陽曬入黎，旁邊又坐多咗一個唔識嘅人，根本無得避。旁邊唔識嘅人若果正正常常食飯都算，但最慘唔係。當然，以香港嘅餐廳，食完阿姐就幫你整走曬啲嘢，然後無情情拖地，希望你唔該十五分鐘搞掂就好走。

可能寫完呢篇文，又有香港人走出黎大罵，「你咁怕搭枱，咪去酒店食囉，人地賺你個百幾蚊午餐，賺得幾多者」。幾咁有力，幾咁有原因，罵得幾咁合理，就好似「你咁唔鐘意咪移民囉！」。係，我預先係度講聲對唔住，我唔記得香港人食開屎就要逼人一齊食。我只係覺得，大家平時為部手機或流動裝置充電，都唔會亂咁堆埋部手機或流動裝置一齊，話驚整花個芒啦。但香港人呢？仲慘過一部手機，被人係餐廳塞埋一齊，曬死熱死逼死情況下食啲嘢落肚，只係為咗生存咁，差在個侍應無話「食快啲，充完啲就快啲死番上去做嘢啦，奴隸」而已。