食開屎的香港人　　不要再叫抑鬱的人「堅強啲啦」因真係好乞人憎

雖然類似的題目，好多網站都寫過好多次，又或者有類似的評論。不過，由於香港人太過習慣逆來順受，食開屎仲要叫人食埋一份，人地唔想食，就大大聲話人唔堅強。日前Linkin Park主音Chester Bennington自殺身亡，香港（其實外國都有）又有啲人叫人「做咩有勇氣尋死，無勇氣生存。」。

大部份香港人本身有無限嘅食屎能力，愈臭愈高興，然後忘記了世界上有唔少受緊情緒困擾抑鬱的人，每日同自己搏鬥。有啲時候，面對困難和事情，係好辛苦。最弊嘅係，香港人日忙夜忙，面對緊問題的人，有啲時候想搵朋友傾訴，香港人一唔係就已讀不回，一唔係就「好少事者，緊強啲啦」。

[the_ad id=”41111″]

最可惡嘅係，香港人總有一種奇怪的比較性格。「人地係非洲個個無飯食添呀」、「睇下人地北韓啲人無自由幾慘」、「係伊拉克出世個個仲無陰公呀」，你問面對緊抑鬱嘅人，佢地鬼唔知自己好過日日俾肥仔金玩嘅北韓人，Chris Cornell和Chester Bennington有名有利，點解最終都係走上自殺條路？無啦啦拎黎比較，係完全幫唔到拯救患抑鬱或情緒問題的生命。更加白痴的，係有啲人會話：你死咗之後有無諗過身邊的人會好傷心呀？大佬，承受緊情緒和抑鬱的人，本身已經好辛苦，你仲要佢地去諗咁多嘢，去諗其他嘢，唔好玩啦。

自殺的人愈黎愈多的情況，其實絕對唔係今次Linkin Park先開始，香港自殺的年青人其實好多，非常非常非常（因為好重要要講三次）可悲嘅係，善忘兼金魚性格的香港人，唔駛過一排，過幾個月左右就唔記得。希望今次為香港人所熟識的Linkin Park的事件，大家可以放低一下工作、做少陣，聽一聽身邊唔開心或受事情困擾的朋友，講兩句吹下水。唔少有自殺念頭的人，都係唔會講出口的，當事情發生的時候，到時就已經太遲。