究竟去咗外國耐　　係咪真係會唔記得廣東話？

以前係香港嘅時候，成日見到啲竹升妹，又或外國返黎嘅人，成日扮唔識講廣東話，見到就真係討厭，明明你係香港出世，去個外國一兩年，返到香港就廣東話講到一舊舊，算掂先。不過，當自己真係去咗外國兩年，發覺有時有啲嘢，原來自己親身經歷，先發覺原來唔係咁講。

由於讀書唔成，好細個係香港就開始出黎工作，做咗十幾年，開咗winandmac.com，搞到變咗間公司winandmac Media，壓力愈來愈大。兩年幾前，決定暫時放手，去英國抖一抖，一抖就抖咗兩年。初黎英國，照常搵工，照常返工，雖然同事之間都有大陸人和澳門人，都仲有機會講中文。但係，基本上放工或者唔搵講中文嘅朋友嘅話，完全都係強逼性講英文。個腦自自然然好多時，就算講一句說話前，都會自動用英文去諗。

本來以為其實都無乜嘢，但因為一啲白事要趕番香港，先發覺真係會有啲問題。第一日同朋友食飯，先發覺真係會有啲嘢唔記得咗點講。雖然未至於話完全唔記得點講咁誇張，但就係講廣東話無以前咁順。係個一下，我先發覺以前識個班外國返黎嘅人，原來唔係扮的。
[the_ad id=”41111″]
住咗一年左右之後，再搬去一個英國鄉村地方，要搵個講中文嘅人都無咁濟，情況就變得更差。可以去到有幾個星期，都無機會講中文或者廣東話咁濟。當突然間要開始再講番廣東話嘅時候，又或甚至要寫嘅時候，真係難咗好多。

當然，可能因為筆者本身好容易受環境影響。寫呢篇唔係想話，去到外國住得耐連母語都完全唔記得點講，只係想講語言嘅嘢真係好受周圍環境影響，唔用、唔講、唔寫，就算係你母語都好，都一定會退步的。另外，下次見到外國返黎嘅朋友，就體諒一下啦。