阿鬼
蘋果每次舉行發佈會，總有一班人大喊「好悶」，明明是為軟件工程師而設的WWDC，竟然曾經有傳媒批評無新機無新產品，唔值一睇。今年WWDC 2017除了標準的iOS更新外，還有勁大量的新產品，包括新Mac、iPad Pro再加上喇叭HomePod。今次咁多新嘢，唔駛蘋果已死啦吓嘛？
WWDC全名明明就係Worldwide Developer Conference，本來就應該著重係軟件上面，不過近幾年蘋果都似乎怕咗大家胡亂評價，愈黎愈就大家。以往Mac機更新，本來一唔係就拆開兩個發佈會，一唔係就靜靜地更新粒處理器，今年擺埋入黎講，應該滿足到大家慾望了吧？而以往會花勁長時間去示範一些軟件新技術，今次都1,2,3,4,5,6咁樣簡明地講，就算係示範軟件，都示範最重要個幾樣就算，節奏真係愈黎愈快。
仲有一樣無可否認嘅係，蘋果好似都被逼要跟住對手做嘢。例如好似對手Google和Amazon推出智能喇叭，蘋果係今次WWDC 2017入面，都忍唔住立刻推出一款俾大家。雖然暫時仍未有得賣，但最少話番俾對手知：我地其實都有。
之不過就算蘋果真係跟住對手做嘢，都唔係咩問題。學Instagram阿頭話齋，有好多idea都唔係原創，唔可以因為對手有一樣嘢，我地就乜都唔做。唔好成日再係度話蘋果無咗Steve Jobs時的風彩，蘋果雖然有啲地方係跟咗大趨勢去出，但總好過懶有型、懶唔同，到最尾公司死咗仲慘啦！蘋果遲係遲啲，但優化得好、出嘅質素夠好就OK啦！
