阿鬼
一部戲拍到第8集，除了星球大戰以外，狂野時速 8肯定係最勁。而且主要角色叫做冇變過，比起星戰其實更加有難度，始終飛車呢類題材，變來變去都有極限，但每次入場都總係有驚喜，今次都唔例外。
例牌講兩句劇情，主角阿當受人要脅，要同成班拍檔做對手，爭奪一些可以影響世界和平的物品，為免劇透，就講住咁多先，總之就有個藉口等大家飛車打交。睇了狂野時速咁多集，係咪合情合理已經唔係重點，尤其係你連第7集成堆車從天而降都接受到的話，證明精彩刺激才是王道！
今集主要睇三場戲，第一場古巴鬥車，個人認為好緊湊好有以前果種風格，所以千祈唔好遲入場！之後就係中間車海大激鬥，可以話係全套戲的高潮，反而尾段「打大佬」，我就覺得係睇緊占士邦，好睇但已經去到超越晒狂野時速的空間，唔係咁狂野時速了，可能今次換上黑人導演Felix Gary Gray，沒有了之前的包袱吧！
劇情就唔使點講，去到咁大製作呢個已經唔係重要，犯駁地方少少都當睇唔到啦，反正可以合理少少交待晒所有刺激場面出現就OK，所以個歹角Charlize Theron唔知點解奸到出汁，前面好醒後來變矇炳都唔緊要，反而係中間阿當扭橋果下太過自圓其說，不過動作片嘛，OK啦！
[the_ad id=”41111″]
[ae-fb-embed url=”https://www.facebook.com/winandmachk/videos/1681764088517206/” width=”720″]
演技方面，真正有得演的其實只有3個人：Vin Diesel阿當、巨石Johnson的Hobbs同埋Jason Statham的型男Deckard，女主角Charlize Theron奸唔到肉，可惜！巨石Johnson可能靠肌肉起家，所以演技都係點到即止果類，唔會太標清又可以過骨；反而今集好重要戲份俾左Jason Statham，絕對係俾張好牌佢上，但時間所限唔係發揮得好好，在機艙一幕甚至有少少過火，但點計呢套戲最交到戲都係佢。至於Vin Diesel，講真由2001年開始演到今日，我諗佢都分唔清自己同阿當有咩分別，一定唔會演得差但驚喜就唔好太期望了！
好唔好睇？點會唔好睇？係咪好驚喜？總會俾到一D你。唔好再睇影評啦，入場啦！
