數據經常不夠用？　　分享小編如何由1個月50GB變5GB

是咁的，呢篇文有少少唔認真，亦都未必一定WORK，純粹係小編想和大家分享一下，如何由過往一個月最少要用50GB，變成現在每個月的數據用量，減少至10GB，甚至乎5GB以下。

第一步：先移居英國、美國或海外

香港政府或某些品牌經常強調戶外Wi-Fi有幾多有幾快，但作為香港人的你和我，都知道實際上是如何。相反小編自從來到美國後，發覺四圍都有Wi-Fi，而且速度正常好多，咁好自然其實駁下Wi-Fi睇嘢都無問題。自自然然，用到數據的機會率減少。你期待香港政府會好好做好戶外Wi-Fi？咪玩啦，拎黎起無用三跑都唔益你班香港人啦。

第二步：減慢生活節奏

香港人24 x 7都要望住部手機，你唔望都唔得，因為老細都假設你做足7日，每日24小時候命。生活係外國，下班就下班，老細不會無情情搵你。而且，面對外國咁靚嘅地方，又無乜大媽，紐約的人行路雖然快，但點計都唔會好似香港咁癲。好多人可能平時太忙，唯一有時間睇下太陽韓仔又或英超重溫的，可能就係搭車的時候，咁數據用得自然比較多。相反，係外國放工先返屋企坐低係梳化慢慢睇，邊似係香港返到屋企仲要唔知趕邊個嘅Project。生活節奏慢咗，自然唔駛成日對住個芒，用咁多數據。

第三步：識番個正常的朋友

係香港，要約朋友出來食飯吹水唔係咁容易。當大家做毒撚的時候，最多人可能又係上下網睇下片，咁樣搞法數據用量唔多就怪了。要減少每月數據用量，識番個好嘅朋友，出黎食飯吹水，警告大家唔好望住部手機，多啲出去玩，又或者甚至乎去藝術博物館行下（編按：香港有無其實？），咁就自然無機會用數據了。