無限數據真正重新降臨香港！　　不過3香港的價錢就…

用家對數據用量的要求愈來愈大，由過往「5GB都夠啦」、「香港人嘈咩嘈」、「用住先咪算」，到現在終於發覺經常唔夠用。3香港最近正式重新推出無限數據計劃，但就改名叫「可享無憂上網」。當然，用家亦要再在月費上狂加錢，才可以變「無憂上網」。

由即日起，3香港6GB或以上月費計劃的4G現有客戶及新客戶，每月要再加額外HK$150選用「超級數據王」，於月費計劃內的數據量用完後，亦可繼續上網，不用額外購買數據，官方稱要繼續打機、煲劇、甚至收看足球賽事等都得。留意用家一旦選用，就要加足12個月。不過，在3香港網站中則寫明「於下一個賬單日前你所享用的網絡資源將因應網絡情況而分配會較少，數據服務體驗或會受到影響。」。亦即尤如過往一樣，用家用得太多數據，網絡優先次序或會被調整。

另外，其智升級的4G入門計劃，全部的速度亦由過往21Mbps升級至41Mbps，月費則保持不變。