遇見你之前‬Me Before You影評　　離地離到上太空港女必睇

愛情片要好睇，首先要雙方地位懸殊，第二要夠慘情，明知不可愛而愛，改篇自小說的《遇見你之前》可以話中晒，富家子弟加貧窮女看護，地點仲要係古堡，無論男女都勢必睇到哭崩！女的會慨嘆自己點解唔做看護，男的會驚覺有錢真係癱了也會跑贏，於是，大家都會哭到停不了！

話說有錢到爆的男主角Will (Sam Claflin)，於一次交通意外後半身不遂，他的母親聘請了靚靚又天真開朗的女主角Lou (Emilia Clarke) 做私家看護，兩人日久生情，最後譜出戀曲咁樣樣！嘩，真係自己講完都覺得老土，事關同類劇情都出現過萬七次，大家應該都似曾相識，不過最令筆者佩服的是場境更浮跨，在古堡內發生，係古堡！兩個人去行街街就是在古堡內推輪椅，還是講起把武士長劍，離地離地離到上太空！

感情方面，女主角本身已經有男朋友，而且都幾上進又專一，但唔知點解女主角照顧男主角不久，就突然對佢產生愛意，除左覺得男主角有錢之外，我真係睇唔出任何其他原因，只可以解讀為有錢就是一切，即使男主角9成9身體癱瘓，一樣冇問題，有錢就算只剩下對眼會碌，都勝過你的健全窮人 (雖然女主角的男友已是企業家，但冇阿Will咁有米)，係咪即係成段感情建築在銀碼大小之上呢？我唔係太知道，但女主角無咩伏線下移情別戀，令我感覺就係錢作怪，你話係咪港女feel到爆炸！

講到演繹方面，無可否認男女主角都演得OK，女主角Emilia Clarke真係演到果種傻氣感覺，偶然有少少位過火，但整體真係算唔錯，唔算非常突出但係夠自然，而男主角Sam Claflin真係型喎，癱瘓了身體的那份無奈，演出來都有少少touching，尤其是和Emilia Clarke的一些親密位都交到戲。當一個角色身體不能動，而要靠面部表情來演所有感情，其實難度係幾高，Sam Claflin的表現算係令人滿意。其他角色例如男角的父母Charles Dance與及Janet McTeer，都演得恰到好處，演活了一對痛苦無奈但有身份教養的父母，出乎意料的融入角色。