叛諜追擊5身份重啟 Jason Bourne5影評　經典再現好似過節

緊湊剪接、手搖鏡頭，非常有型的《叛諜追擊》系列終於來到第5集，不計上一集疑似外傳又冇Matt Damon的第4集，闊別了9年的《叛諜追擊》終於回歸，由年青演到變中佬的Matt Damon，今集冇令大家失望，不過感覺就好似睇Eason或者學友演唱會咁，係好，但都係預期之內！

預告片上的Matt Damon晒肌肉同人隻揪，如果你好欣賞呢個片段，建議你唔好遲入場。入返正題，導演Paul Greengrass與Matt Damon再度合作的《叛諜追擊5》，動作場面一定唔少得，開頭的一段飛車追逐配合城市暴亂，都有一定新意，大家更可以對號入座，幻想有一日香港都亂到七彩，會不會有個Jason Bourne出來救人呢！另一場最強的追逐就是近尾的賭城拉斯維加斯追殺，熱鬧誇張到一個點，就是穩穩陣陣一定俾到你刺激的設計。

話明諜戰今次索性加入斯諾登這個真實人物，意圖加強故事的真實感。不過作為一個失憶特務的Matt Damon，其實同全世界的個人私穩冇咩關係，你會發覺他一直都只係為自己而戰，而另一位身為企業才俊的，卻被迫要和政府合作，似乎又有少少牽強。所以在橋段方面今集比起之前唔夠有力，自自然然會影響了壓迫感，畢竟之前的Matt Damon是因為失憶而尋找自己，到了現在回復記憶，就一定要有一個更加明確的目標，才可以把劇情甚至角色，推展至一個新境界。

演技方面，Matt Damon都是演返Jason Bourne，喜歡的人都仍然會喜歡，沒有懸念。反而Vincent Cassel同Tommy Lee Jones這些反派唔夠勁，作為一個殺手Vincent Cassel得個衝動，而Tommy Lee Jones做一個高高高層，又完全唔夠陰險，你叫Matt Damon點去打大佬。原來的期望放在影后Alicia Vikander上，因為亦忠亦奸的靚女從來最好演，只可惜劇本寫得佢唔夠深入，想她演出野心勃勃但總是有點軟弱無力，末了更來一個反高潮位令我O了咀，女強人理應是更勁的吧！結論就是，睇《叛諜追擊5》好似過時過節咁，都一定會開心，但有點公式就是了！