阿鬼
香港人打工想發圍？發夢就有你份！所以難怪大家唔係炒樓就係炒股，有需求就有市場，個個都知就自然好多先知，扮晒專家大有人在，升穿一蚊可以追，跌穿9毫就要止蝕呢類金句日日都聽，之不過如果好似「華爾街綁架直擊」個主角咁瞓身，瞓街就係必然的結局！
唔怕少少劇透，個故仔好直接，George Clooney飾演美國財經電視節目Money Monster主持人，屬於撈得好掂果類人，而且節目亦都鋪排佢唔係純粹吹水果種財演，都有馬仔幫佢做過下調查先出聲，但講真佢又唔係神仙，始終都會講唔中，有次佢叫人飛身入隻股票，點知害到一個由Jack O’Connell飾演的準爸爸輸晒成副身家，於是持槍和炸藥偷入電視台，誓言要直播找出輸錢真相！而影后Julia Roberts就飾演一個新聞導演，鎮定地指揮下屬直擊整件事情！
老老豆豆，如果主角咁都要炸電視台，TBB應該都炸左九世啦，不過講故唔好駁故，純粹講故事我覺得都OK順暢，而且當中加入不少幽默元素，令到劇情無咁沉重，但若論劇情就真係太過直，即係你睇頭10分鐘就已經估到結尾果種，唔會有一個好驚喜的轉折，主要靠演員的演技來迫出戲味。結尾部分描述到大奸角太無能了，我覺得作為一個搵食搵了好多年的華爾街大鱷，是絕對不會如此低能的，而且佢露底的原因竟是因為有「正義力量」幫手，其實有點牽強，想知什麼是「正義力量」，自己入場睇啦！
講到演技，George Clooney同Julia Roberts仲邊有得輸，反而係個故仔細位唔夠多，俾唔到十足機會佢地發揮，出7成力都夠交功課啦講真！在兩大勁人夾擊之下，主角之一的Jack O’Connell只可以話係不過不失，反而其他配角就發揮得更好，值得一讚。介紹返，今次的導演是Jodie Foster，即係由童星演到大再以「沉默的羔羊」出晒名果位，近年來佢主力轉型做導演，連Netflix的House of Cards佢都有執導過，講返呢套「華爾街綁架直擊」的表現，只可以講好似公用股咁，穩穩陣陣又唔會有驚喜，入場睇下無妨囉！其實筆者一路睇一路諗，如果整返個香港版本，應該都幾有綽頭，而且香港好多散戶，應該睇得好有代入感！
