阿鬼
唔係占士邦唔係占士金馬倫，如果你真係想入場睇《捕捉占士甸》，首先你要知邊個係占士甸，否則你坐成兩個鐘睇兩位主角行來行去，真係會癲！《捕捉占士甸》改編自真實故事，重現永恆巨星占士甸憑《阿飛正傳》走紅前的最後一次回家旅程。《阿飛正傳》你識啦，不過唔係王家衛粒粒巨星梁朝偉出最後3分鐘果套，係堅‧阿飛正傳，都未聽過？咁真係要做足功課先好入場。
先講一講劇情，1955年，攝影師Dennis Stock (Robert Pattinson飾) 出席《蕩母痴兒》試映會，被占士甸 (Dane DeHaan飾) 的獨特氣質深深吸引，深信他會一炮而紅。二人惺惺相惜，Dennis再三邀請占士甸為《Life》雜誌拍攝專輯，但每次占士甸都推三推四。但可能推得太多唔好意思，占士甸反建議丹尼斯一起到自己老家印地安納散心。Dennis沿路隨意替占士甸拍照，都係類似今時今日chok下chok下再lifestyle的snapshot，咁最最重要係最後占士甸當紅加早死，這輯相便成經典。
這套戲沒有太多高低起伏，亦沒有刻意搞什麼高潮位，就好似阿發哥未紅之前，你同佢入返南丫島，見埋佢屋企人再打聲招呼咁，然後就搭返船出九龍一樣。其實用發哥比喻都唔係太似，應該係李小龍，因為佢又係爆紅成為經典又係拍左幾套戲就過身，試想想你响佢套唐山大兄未上畫之前，你同佢返屋企，拍下佢食飯吹水牙刷刷既樣，而之後紅左就冇得拍佢日常生活，於是輯相就成為經典，攝影師就因為咁而出名。我唔知Dennis Stock係咪咁慧眼識英雄，定只係撞彩好手神，但《捕捉占士甸》對Dennis Stock或者占士甸的描繪都唔係好夠，好平面，我覺得故事平淡唔係問題，但呢種人生小片段好考編劇功力，絕對係劇本定生死，而明顯《捕捉占士甸》的劇本比較乏力，你見到Robert Pattinson同Dane DeHaan (尤其係Dane DeHaan) 都好盡力去演，不過問心講，邊個演都唔會演得出神入化。
如果你上YouTube睇返占士甸的訪問同演出，就知道Dane DeHaan在身體姿態及口音上都幾似，算交足功課，Robert Pattinson作為一個攝影師，反而沒有什麼可演，最常做的事就是拿起相機影影影，有影相經驗都朋友都知道，演攝影師來來去去就是那麼幾個動作，好難演！《捕捉占士甸》這個題材其實有得發揮，怪就怪劇本唔夠力，支撐一個電影稍嫌吃力，如果你真係好想入場一看，建議先上YouTube望多幾眼占士甸，相信代入感會大好多。
[youtube url=”https://youtu.be/fD39tHOqf6U”]
