阿鬼
有些戲，你睇完宣傳再入場睇戲，會失望而回，原因係宣傳太強勁，讓你感覺這套電影一定好好睇，結果就算是不過不失，你也會覺得不外如是，而《非常索凸務2》正正令我覺得如果抱太大期望的話，會和你預期有很大落差，所以入場之前最緊要：調整期望！
相對上一套的《發夢王大歷險》，雖然唔算勁好笑太意義深遠，完全估唔到有咁多反思位！相反今次的《非常索凸務2》意圖搞笑，但笑位真的比較爛，小編其實一路睇一路懷疑自己，係咪我唔夠fashion sense唔夠時尚，根本唔夠class去笑，定係D笑位太小眾？好少人識笑。我之後上網睇下鬼佬評價，發現連外國觀眾都覺得笑位太爛，根本笑唔出，可能我要惡補好多時裝同美國文化先識笑吧！我不知道這個是我問題還是《非常索凸務2》的問題，但文化差異，會是你笑唔笑得出的其中一個原因，入場前要有覺悟！
演員方面，我覺得無懈可擊，唔計主角Ben Stiller同Owen Wilson，其他的陣容足夠曬冷，Sting、Benedict Cumberbatch、Justin Bieber，仲有Katy Perry、Kiefer Sutherland，甚至美國版Vogue主編Anna Wintour、設計師Marc Jacobs、Valentino、王大仁和超模Kate Moss！嘩，邊有得輸？但偏偏就係太多勁人，就好似港產賀歲片一樣，夠人頭就理所當然係賣座保證，結果係劇本一般笑位麻麻，成為一套純「曬冷」之作。
係咪咁流？我敢保證有晶哥的《賭城風雲3》，世上從此無爛片，只不過我覺得Ben Stiller手拎成副靚牌，就似乎可以做得更好！可惜的是，Ben Stiller擅長搞玩電影或廣告片段，例如與Naomi Campbell演出的《生命之水》廣告、Justin Bieber被亂槍掃射的片段等，都落足心機，但因為背後是美國文化基因，如沒有看過Justin Bieber客串美劇CSI之經典場面，根本笑不出來！最後要讚一讚翻譯字幕的朋友，由於《非常索凸務2》太過美式，字位也要特地「本土化」，但因為笑位絕不是明白字面意思那麼簡單，所以即使他們盡了九牛二虎之力狂譯得好笑，我也笑不出來，只能說句：同志們，辛苦了！
[youtube url=”https://youtu.be/5PL96_xQdH4″]
