阿鬼
改篇外國暢銷小說，通常都伏味濃，《第五天劫》改編自美國作家Rick Yance暢銷小說The 5th Wave，聽講好似《飢餓遊戲》咁有三部曲，不過《飢餓遊戲》都叫做頭威頭勢，第一隻都有唔少人叫好，而這部《第五天劫》就真係被人插到上天花板，究竟出了什麼事？又是否真係咁劫呢？
老土都要講少少劇情，而且唔怕劇透，因為透完你都睇唔透，一開始講外星人向地球先後發動了四輪攻擊，每一次都比上次嚴峻，女主角Cassie不斷逃亡，同時勢要拯救失蹤的弟弟，而這時她知道要面臨第五輪攻擊，即是《第五天劫》！嘩，好科幻好緊張呀，實情是，頭10分鐘你已睇完99%的特技，如果你一心入場當特技片睇，可‧以‧離‧場！之後的時間你就會像睇TVB《愛回家》一樣，不斷是婆婆媽媽的對白及犯駁到唔信的劇情，完全係「估你唔到」。
算了，劇情這回事，可能真係我識條鐵，體會不到。但拍攝技巧、分鏡以至特技等，你也會覺得未及一般標準，尤其是有些較暗的場面，更是在處理上有極大問題。例如有幾個人在打鬥的一場，畫面黑到我連誰有打誰也看不清楚，畫面之黑絕對比香港知名的暗角七警更加暗，我只可以說這套大片完全汲取了香港警方的經驗，一定要有咁暗set咁暗才可以郁手；又或是曲線向香港的民主運動致敬，如果是這樣的話，我只可以說句導演是百世難得一遇的天才。
可以俾些少分的，是戲中的角色演得還算可以，尤其是《勁揪俠2》的Chloe Grace Moretz，都幾盡力去演，與其他演員的互動也算恰如其分，即使飾演Chloe Grace Moretz弟弟的童星Zackary Arthur都演得自然活潑，無奈劇本處理上真的有很多問題，即使是影帝影后相信都挽回不到大局。有人話你唔好當災難片睇啦、你唔好當特技片睇啦！《第五天劫》的海報設計就是一張災難特技片的海報，咁我真‧心想知道，你覺得我應該抱什麼心態入場？是格鬥片、笑片還是愛情動作片？又正如本片導演J Blakeson幾年前最出色的《愛麗絲蒸發奇案》片名一樣，這套《第五天劫》為什麼拍成這樣，也是一套奇案！
[youtube url=”http://youtu.be/FmQic8rOyho “]
