阿鬼
香港人被人壓逼慣了，早就白痴得極致。銅鑼灣書店被人捉？「聽聞佢地叫雞嘛！」全民退保？聽聞坤哥乜乜乜呀！網絡23條？我都唔做創作嘅，唔關我事。還記得當年winandmac嚴詞要爭取電訊商繼續提供無限數據計劃，除了行家批評外，還有很多人話：其實，你用少啲咪得囉，邊個叫你係街煲劇呀乜乜乜。發展到現在，很多身邊的人的電話費，為了數據月費逼近一千元。當初，這班人不是說用少啲就得嘛？
最近回港，發現電訊商針對數據用量的限制愈來愈嚴，就算你用無限，5GB後一定限速無情講。香港人蠢到爆炸，成日被數字蒙蔽。沒錯，地鐵是有Wi-Fi，但行駛時根本用唔到。沒錯，咖啡店是有Wi-Fi，但除了限時外，若果是在旺區，有幾多間的咖啡店Wi-Fi真正用到？沒錯，全港有很多熱點，數字很好看，但又有幾多個可以用到？
當年，我們winandmac就預計過，未來數據用量只會不停上升，香港戶外Wi-Fi完全靠唔住，數量比外國不少城市多，但用到的亦都不多，所以極度反對電訊商取消無限數據計劃。可惜的是，總有唔少人成日叫人用少啲，講埋呢啲廢話，倒不如不要用智能手機好了。成日都話5GB或10GB或20GB夠用，永遠不去想長遠一點。
以美國做例子，原本像香港電訊商的AT&T及Verizon，面對愈來愈多人反抗和不滿，跳去T-Mobile無限數據計劃，Verizon和AT&T都因此要在原本數據計劃上加碼，某些計劃更加多達一倍數據。AT&T旗下的Cricket品牌，更保留有假無限數據計劃，雖然不像T-Mobile真無限，但Cricket以US$50月費頭5GB 4G LTE速度，其後才限速，也算是合理。反觀香港，情況則剛好相反，同等月費的計劃，數據用量卻一直減少。
香港人嘛，模式永遠都是一樣的，面對不公平的事，不能勇敢站出來爭取，反而呃自己，到後來發現什麼都沒有，才來後悔。電訊商取消無限數據？哦，唔緊要啦，用少啲囉，用者自付公平啲嘛。當發覺唔夠數據用的時候，又再次呃自己：「咁咪深水埗搵卡買囉，都唔係好煩者」，但其實要花半日一日出去左問右問，又要上網研究，認真無陰公。
發展到最後，每個月為了上網付達千元，再呃自己：「都無計啦，咁都要用，仲負擔到又佢先啦」。每一次，香港人都只懂退讓，還要責罵一些願意站出來爭取的人。老實說，就算有多願意站出來，面對這樣也會心淡。數據計劃情況如是，生活上的事情如是，政治上的事情也如是。
