阿鬼
美國隊長Chris Evans，大家都公認靚仔，不過做美國隊長又冇咩陰暗面，永遠都一個正義樣，真係好難知佢演技好唔好！於是，我入場睇了這套由Chris Evans自導自演的愛情戲，感覺是：美國隊長你都係打返壞人把啦！
其實我唔應該咁早下定論，Chris Evans演技可能勁過湯漢斯，不過《日出前的邂逅》的劇情，只是一男一女（女主角是Alice Eve）夜晚在街上行來行去，最初仲有少少目的，到後來連那個目的也沒有了，兩個人就真的是在遊盪，在香港，應該被慈母拉左！可能最後編劇都想不到如何完場，於是兩個人又突然上了酒店房，而竟然什麼都沒有發生，之後又離開了，我不知道原來這是一套純愛片！
講真，要兩個人在街上行成晚，又冇特別的事發生，真的很難處理。一路睇一路問自己，是否在看舞台劇，只是入了戲院睇，才以為自己睇戲！因為整套戲的場境變化不大，對手戲就是男女主角在做，一副舞台劇格局。但問題在於，他們似乎被編劇玩了，因為由頭到尾都沒有高潮位，就好像你朋友冇帶鎖匙，你陪佢行通宵等到天光，最後佢搵到屋企人開門，最後各自返屋企一樣。
Chris Evans冇錯係靚仔，在戲中都出力地chok，甚至比黃曉明更chok，但問題是兩個陌生男女為何行街也會變成相遇相知？哪一個位令兩個人突然意識到對方是生命中最重要的人？我feel唔到，只是覺得突然間明張目膽話愛就愛，既然大家可以咁好feel，為何去到酒店又唔做愛做的事呢？太多疑團，令我投入不到這段感情，可能我已沒有腳骨力行通宵，又或者，我不相信孤男寡女上酒店換了浴袍會冇事發生。而更大的可能，是我太老了，不再浪漫！
[youtube url=”https://youtu.be/9V72_Byku9Q”]
