阿鬼
講真，近年的Marvel我真係受夠，一味大堆頭睇到你眼花，打來打去射來射去，有時我根本分唔出唔同英雄有咩分別！好在有蟻俠，由一個新角度去演繹英雄角色，尤其係蟻俠咁細粒，可以玩的視覺效果多好多，記者看了IMAX場次，確係好震撼！
故事都幾例牌，都係個發明家發明了一樣好勁好勁的科技，然後就有個主角用了這個科技變身超級英雄，今次主角就靠件衫變身成蟻俠打餐飽，仲要飛天入地四圍去，帶俾觀眾完全唔同的感觀享受。可能你會話，超級英雄個個都誇張，雷神上埋太空啦，有咩咁奇？奇就奇在蟻俠會給你一個微縮的世界，你可以用蟻俠的眼光去睇水渠、睇浴缸、睇手機。記者在IMAX戲院內睇蟻俠，個比例就更加誇張，特別係細細的蟻俠在好大的環境內穿梭時，有時真係快到有少少頭暈，但的確係睇到嘩嘩聲，而呢種嘩嘩聲，已經係好多年前睇Marvel戲先至有。
縮到細細粒其實之前小人國的電影都有，但通常細細粒的都是弱者，所以當咁細的蟻俠又係超級英雄時，出來的效果會很有趣。我最欣賞的是導演處理蟻俠的方法，例如可以隨時變大縮少，在打鬥時有更多創新玩法，特別是蟻俠可以利用放大縮少來對付對手時，更加有戲劇效果。當然另外要一讚的，是那些蟻兵非常幫到手，原來不同的蟻都有不同的功能，這個就不在此劇透，留待大家入場慢慢欣賞了。至於另一大看點，就是有一個人傳人講秘密的情節，拍起來相當搞笑，成為本片笑位之一。
不過講到情節方面，就似乎要扣一扣分，因為仔細一想，有很多位都沒有太詳盡交待，例如由Michael Douglas飾演的物理學博士，和女兒Evangeline Lilly的關係就比較奇怪；又例如Paul Stephen Rudd飾演主角蟻人，好像是博士故意安排的，但原因又很牽強；總之你一邊看一邊會有一些問號，不過俗話話講故唔好駁故，反正看這類故事，你要的也不是劇情，特技出色場面熱鬧就叫做好睇，這一點蟻俠絕對俾到你，加上有唔少笑位，值得入場。[youtube url=”https://youtu.be/xhAjoTxQNmk”]
