阿鬼
近來報章雜誌，有很多勵志的上車故事，包括最近陳生靠著努力和規劃，以及父親的600萬，成功上車和購入單位。老實說，我母親既沒有改嫁，也沒有護士老婆，更沒可能食個麵包就可以用港女式語氣說：「我飽了」，上車供樓肯定是遙不可及的夢想。近排，我終於為我的人生「破處」，課金俾Line Rangers，個人覺得，課金俾Line Rangers都好過供樓囉。
你可能又會話，玩手機遊戲的嘢，點解要俾錢咁傻。然後，又會再責罵，「真係好唔實在」、「唔怪得你買唔到樓」、「浪費曬啲錢」、「好心你學下人勤力啲，慳番幾百蚊，一個月就慳唔少，一年就儲到好多錢，好快就夠俾首期」等等。
夠了！
我自出細個一刻開始，就有人叫我努力讀書，第時就會賺好多好多錢。大個之後，讀又讀完大學，借埋借埋，然後你又話唔夠，要讀埋博士，當我身家係未讀完書前已有幾百萬。龍門任你擺，讀完博士，出黎又係搵番萬幾兩萬的工，上車舖最抵的四五百幾萬，點供呀。我明白，活係香港，一日食足早、午、晚三餐，基本上係浪費錢兼罪過。我唯有怪我老母，點解生我出黎要咁大食，一日食三餐係香港真係好離譜，搞到我儲唔到錢，買唔到樓。當香港的餐廳愈來愈貴，份量卻愈來愈少，我身體愈來愈瘦，我會怪點解我身體唔努力啲。
有人叫我少啲抱怨，直至有一日我發現Line Rangers，我開始發覺我人生可以有啲嘢係課金課得開心好多。Line Rangers唔會好似香港啲樓價咁，雖則都有加咗價，但唔會貴到大家負擔唔到。相反，有時仲會有折扣，買鑽石抽的數量會更多。大家仲可以量力而為，由最便宜的HK$15都有交易。HK$15而家想食個下午茶都未必得，講真。而且，大家亦未必要每日真係課金，課一兩次停下隔一排又課都無問題。相反，供樓你每日都要慳，食一個麵包可能都浪費錢，仲要唔知供幾廿年，中間亦唔可以選擇突然停下。
最緊要的，係佢地的人真係會聽意見，有人話佢地啲進化寶物太難儲，又或羽毛制度問題，佢地宣佈下星期一（4月6日）會改善。唔會好似香港的689咁，話聆聽市民意見，但實際當聽唔到。玩Line Rangers課金雖然可能會課好多錢，但最少抽中自己想要的Edward（上圖），打完機心情又開朗啲，唔駛日日擔心，生活費會否更貴、工作會否突然失業、自己會否突然供唔到層樓等等的問題囉！
